［咩國家最倚賴貿易？］答案你應該估唔到。
1. 彭博篇文仲有好多好有趣嘅圖（https://bloom.bg/3b5fOLu），但我只講呢張。Trade as a share of GDP（＊），貿易額佔GDP幾多巴仙
2. 美國，相當低，28%，可能好多人都會估到。人口夠大，地又多，資源豐富，錢又多，科技亦勁，唔使討論嘅第一大強國，齋內需都夠，其實唔係好使靠咩貿易，亦所以開打貿易戰好似幾合理—佢唔使點靠貿易。Fair enough
3. 但，中國，其實都好低，唔高過美國幾多，38%。就好多人估唔到了。喂，世界工廠喎。但不能忽視中國十九幾億人喎，內需一樣好強勁，你見好多品牌根本唔使做外國生意（美國亦都係），亦都係因為咁嘅原因，你見啲科企獨角獸都係中美居多。當然，附注（＊）會講，你其他產業都會受貿易影響嘅。
4. 睇埋其他，表度最大嘅係盧森堡，387%，不意外，其實我唔知盧森堡除咗有間鋼鐵廠ArcelorMittal上市同洗黑錢外仲有乜產業。「即係香港再加間鋼廠」。
5. 另外，係咪大國（計人口）內需市場大就一定唔多依賴貿易？又未必，越南就夠大（成億人呀大佬，多過咩德國法國英國），但名列前矛，387%。其實有人話係類似中國咁，出口為主—但中國明明就排得好低。所以一係就係越南係廿年三十年前嘅中國（但睇返，即使係最高時，2006年，中國都未到70%），一係就越南仲係太窮。
6. 留意越南真係歐拉牙。去到200%樓上嘅，基本上全部都係小國，新加坡馬耳他盧森堡之類，即使愛爾蘭匈牙利阿聯猶之類都唔過1000萬人—但越南成億人。成億人嘅國家入面，好似冇一個過100%
7. 係咪有錢又多人就唔會太依賴？又唔係喎。德國都幾高，遠高於中國，去到89%。G20入面最高了。
8. 同樣都算富有又多人又好似係出口大國嘅日本呢？反而係極低。圖度冇，但應該只係高過美國少少，低過中國。
9. 至於香港嘛，「香港幾時變咗國家？」。圖度冇。不過你估都估到高，我搵到梳屎話300%左右，高唔過盧森堡，但在圖上面都頭幾位了。當然香港仲有四大產業：包括飲食（渣鑊鏟），建築（「搭棚」）， 印刷（出公仔紙）同埋水務（cap水）
10. 另外，巴西同阿根廷，都係極低的，唔係出口唔少農產品咩？但留意，計$喎。一架飛機其實頂你好多甘庶牛肉。另外蘇丹尼日利亞都極低，四個國家都係大，人口多。
11. 結論？其實好似係冇嘅，冇話高好定低好。當然你可以話高嘅太依賴貿易好危險，但其實小國好多都係咁，根本冇得揀，因為內需市場太細。
12. 仲有就係，相當有趣地，打貿易戰最兇嘅國家，中國美國，其實個數字都好低嘅。
13. 維基都有呢啲資料，可能有少少唔同，就自己研究點解（http://bit.ly/36Kmgo5）
（＊）留意兩樣嘢。首先，呢個Trade／GDP量度當然可以質疑。貿易額唔大嘅嘢，都可以好重要，例如美國禁晶片，或者中國啲稀土，或者日韓貿易戰時啲材料，唔使好貴嘅嘢，但夠拖冧你啲產業。另外，我成日都懷疑呢啲Trade／GDP嘅量度有冇意義，正如你睇香港會講乜乜行業佔幾多GDP，但實際上根本不能咁分開嚟睇。有個講法話大陸要靠香港拎美金之類云云，真假不重要，但見到係，你金融業佔嘅 GDP未必好多，但冇咗佢你就仆得街。
Search